"En nou:
geloof, hoop en liefde bly, hierdie drie.
En die grootste
hiervan is die liefde!"
1 Korintiërs 13:13
Elke meisie droom
oor haar troudag en dit is fantasties as die waarwording daarvan op die horison
begin wink! Die wit rok, die eerste soen
en jul lewens wat nou saam begin as Meneer en Mevrou! Dit is 'n pragtige
dag of dit nou reën of hael want jy is die prinses in die sprokiesverhaal en
jou prins is aan jou sy!
Hierdie dag wat so
getooi is met blomme en lag en sjampanje en
dans is maar die eerste dag van jul toekoms saam en is uitgedroom in die
kleinste detail. Ure se beplanning en idees bymekaar maak uit hope
tydskrifte en van Pinterest af.
Daar is lang besprekings oor of julle nou jou klein nefie gaan vra om die
kerkblaadjies vir die gaste uit te deel sodra hul daar aankom en of julle dit
eerder opgerol in 'n mandjie by die ingang van die kerk gaan
sit. En dit is heeltemal te verstane, mens staan nie net een oggend
op en besluit om vandag te trou en alles is perfek
soos in jou droom nie. Dis voorbereiding, opoffering en inspanning - en
dis alles jou droomdag werd.
Tog weet ons almal
dat dit in die huwelik self is waar ons die meeste van ons tyd gaan spandeer en
nie in ons wit rok
nie. Ons droom ook van “happily ever after” - vir altyd verlief en gelukkig tot die dood ons
skei! 'n Huwelik wat altyd vol van geloof, hoop en veral liefde sal
wees wanneer die troudag blomme verlep het en die sjampanje op is. Ons
huweliksdroom is eintlik maar net soos ons troudag droom - dis voorbereiding,
opoffering en inspanning - en dis alles jou huweliksdroom
werd!
Daar is oorgenoeg
blogs, webtuistes en idees om jou troudag soos 'n troue uit 'n bruidstydskrif te laat lyk. Trougereed is egter 'n blog gefokus om
jou "ever after " waar te maak. Om jou voor te berei om te trou
met die een wat jy liefhet en om liefde te kies
elke dag daarna.
Mag wat jy hier
beleef jou inspireer om in alle opsigte Trougereed te wees .
Baie voorspoed en
seën vir jou huwelik
