Aan die einde van
elke jaar reflekteer ons op die jaar wat verby is. Ons dink aan al die dinge wat ons reggekry
het of nie reggekry het nie en aan die hoogte- en laagtepunte. Ons dink ook aan of ons huwelik gegroei het
en of ons op 'n beter plek is as die jaar vantevore. Na ons op die vorige jaar gereflekteer het, beplan ons ook die volgende jaar om seker te maak dat ons huwelik aanhou groei
want soos Andy Stanley sê "To fall in love requires a pulse. To stay in love requires a plan." Ek deel graag met julle 5 dinge wat ons in
2014 anders wil doen om in ons huwelik te belê.
- Ons gaan BEGROOT vir ons huwelik
Ons
het een keer 'n praatjie van Floris Knouwds bygewoon en hy het voorgestel dat
net soos mens begroot vir kruideniersware, mediese fonds, Desembervakansie ens.
moet jy ook vir jou huwelik begroot. Dan
is dit maklik om saam op 'n huwelikskursus te gaan of saam weg te gaan vir 'n
naweek. Selfs 'n koppie koffie saam met
jou man is geld wat goed belê word.
- Ons gaan BELê in ons huwelik
Net
soos ons beplan het om ten minste drie keer 'n week te gaan oefen, wanneer ons
op vakansie gaan en watter aande ons selgroep bymekaar gaan kom het ons ook
sekere aktiwiteite beplan wat ons huwelik sterkter kan maak. "A great marriage isn't something that just happens; it's something that must
be created" Fawn Weaver. Ons wil
spesifiek 'n huweliksboek koop en saam deurwerk wat ons dan uit ons
huweliksbegroting sal kan betaal. (ps.
Laat weet my as julle van goeie boeke weet wat nog nie op die boekrak is nie). Ander voorbeelde van hoe ons in ons huwelik
wil belê is deur elke Vrydagaand 'n 'datenight' te hou om seker te maak ons gee
mekaar onverdeelde aandag :) As ons
Vrydaeaande na iets anders genooi word sal ons miskien ons 'datenight' aanskuif
of vroeër skuif maar gebeur gaan dit gebeur.
Selfs 'n vroegoggend ontbyt by die boeremark is ook vir ons 'n 'date'.
- Ons gaan BID vir ons huwelik
Dit
is defnitief een van die goed wat ons die meeste afgeskeep het maar iets wat
God op ons albei se harte druk om passievol te begin uitleef. Die feit dat ons eenheid wil behou in ons
huwelik is amper 'n waarborg dat die duiwel onenigheid tussen ons sal wil
bring. Ons gaan probeer om al is dit net
twee minute voor werk in die oggende, saam of apart, vir ons huwelik te bid en
mekaar op te dra aan God.
- Ons gaan BEWUS wees van mekaar
Dit
gebeur so maklik dat mens verby mekaar begin lewe. In "The love list" deur Drs Les and Leslie Parrot skryf hulle oor 'n
paar goed wat mens elke dag kan doen om seker te maak dit gebeur nie. Klein goedjies sal insluit om as julle van
die werk af kom mekaar 'n lekker lang soen te gee, oogkontak te maak en mekaar
vas te hou. Ek weet
persoonlik dat facebook ons albei verhoed om op mekaar te fokus al sit ons
langs mekaar in die bed. Ons het besluit
dat ons een keer op 'n dag 'ons tydjie' het.
Ons sal of gaan stap, saam bad of op die stoep sit en tee drink en net
bewustelik teenwoordig wees sonder alles anders wat ons aandag vereis.
- Ons gaan BAIE saam Droom (okay okay, Droom het nie met 'n B begin nie maar dit is ook goed om BAIE saam te droom)
In
2014 wil ons meer dinge saam aanpak! Ons wil saam 'n 21 km hardloop ('n eerste
vir ons albei), ons wil oorsee gaan, ons wil vir 10 dae lank van suiker en gluten vas, ons wil 'n naweek wegbreek wat
ons net in God se teenwoordigheid spandeer, ons wil begin dink aan 'n gesin
(eek!, ek hoop nie my skoonouers lees hierdie nie - die klem is op dink :) ),
ons wil 'n braai reël vir ons woonstelblok, ons wil nuwe vriende maak, ons wil beter wees met verjaarsdae onthou en geskenke gee, ons wil mekaar se grootste 'cheerleaders'
wees en ons wil God vertrou vir
finansies om al hierdie lekker dinge te doen.
Sien
- daar's BAIE dinge waaroor mens kan droom en dit is seker een van die
lekkerste dinge van getroud wees vir my! Waaroor droom julle en hoe maak julle
dit prakties?
No comments:
Post a Comment